ពេស្យាចារ ត្រូវបានគេចាត់ទុកថា ជារបរចំណាស់មួយ។ នៅប្រទេសវៀតណាម មិនមានច្បាប់ណាមួយ ដែលអនុញ្ញាតឲ្យរកស៊ីលក់ដូរភេទនៅលើទឹកដីនេះទេ តែអ្នកប្រកបរបរប្រភេទនេះ កំពុងទាមទារឲ្យរដ្ឋាភិបាលរៀបចំធ្វើច្បាប់ ដើម្បីអនុញ្ញាតឲ្យការរកស៊ីអាជីវកម្មផ្លូវភេទ អាចប្រព្រឹត្តទៅបាន ដោយស្របច្បាប់។
រដ្ឋសភារៀតណាម បានប្រកាសថា នឹងបើកកិច្ចប្រជុំពិភាក្សា ស្តីពីរបររកស៊ីផ្លូវភេទ នៅខែតុលាខាងមុខនេះ។
នៅក្នុងប្រទេសវៀតណាម ពេស្យាចារ ត្រូវបានចាត់ទុកថា ជាវិបត្តិសង្គម។ ចំពោះមុខបញ្ហាដូច្នេះ អ្នករកស៊ីផ្លូវភេទជនជាតិវៀតណាម នៅតែប្រាថ្នាចង់ឲ្យរដ្ឋាភិបាលអនុញាតឲ្យរបររកស៊ីជួញដូរភេទ ប្រព្រឹត្តទៅដោយស្របច្បាប់។
ក្នុងពេលថ្មីៗនេះ ប្រធានបទជុំវិញ ការរកស៊ីផ្លូវភេទ ត្រូវបានគេយកទៅជជែកពិភាក្សាតាមបណ្តាញសង្គម និងប្រព័ន្ធអ៊ិនធឺណិត ហើយសារព័ត៌មានផ្លូវការរបស់រដ្ឋ ក៏បានចុះផ្សាយពីរឿងនេះផងដែរ។
កាលពីឆ្នាំមុន អាជ្ញាធរក្រុងហូជីមិញ បានអត់ឱនខ្លះដែរ ដល់អ្នករកស៊ីរបរប្រភេទនេះ ដោយបង្កើតឲ្យមាន “តំបន់ក្រហម” នោះគឺ ផ្ទះបន ហាងម៉ាស្សាអាជីវកម្មផ្លូវភេទ និងរង្គសាលក្លិបកម្សាន្តខារ៉ាអូខេ ខ្លះៗនៅភាគខាងត្បូងនៃក្រុងហូជីមិញ។ ប៉ុន្តែនៅក្នុងក្រុងហាណូយវិញ អាជ្ញាធរបង្គាប់ឲ្យចាប់ជនណាដែលទិញសេវាកម្មភេទ។
ប្រធានវិទ្យាស្ថានសម្រាប់ការសិក្សាអភិវឌ្ឍសង្គម ដែលជាអង្គការក្រៅរដ្ឋាភិបាលមួយ បាននិយាយថា៖ «គេមិនត្រូវដាក់ទោសព្រហ្មទណ្ឌ លើអ្នករកស៊ីផ្លូវភេទទេ។ ផ្ទុយទៅវិញ គេត្រូវអនុម័តច្បាប់ ឲ្យការរស៊ីផ្លូវភេទ ប្រព្រឹត្តទៅដោយស្របច្បាប់ ព្រោះ វាអាចជួយបញ្ជៀសការជួញមនុស្សផងដែរ»។
គួរបញ្ជាក់ថា ការស្រាវជ្រាវនៅវៀតណាម បានឲ្យដឹងថា ក្នុងចំណោមអ្នករកស៊ីផ្លូវភេទ២០ម៉ឺននាក់ មាន៤០ភាគ ត្រូវបានគេរកឃើញថា មានផ្ទុកមេរោគអេដស៍៕
អត្ថបទនេះ មិនផ្សាយជាសំឡេងនៅវិទ្យុទេ ដោយសារតែអ្នករៀបចំការផ្សាយ ( Conductor ) យល់ឃើញថា មិនទាន់មានភាពសំខាន់គ្រប់គ្រាន់សម្រាប់ការផ្សាយ។ ទោះបីជាលោកអគ្គនាយកស្ថានីយ៍បានពិនិត្យ យល់ព្រមនិងឯកភាពសម្រាប់ផ្សាយហើយក្តី។
Vous devez être connecté pour poster un commentaire.